啟航吧！編舟計畫

小說版、動畫、真人電影封面：


睇返自己寫過嘅嘢，原來我無寫過《啟航吧！編舟計畫》，

好意外！可能因為太冷門！但我係好鍾意呢個故事！
簡單啲嚟講，我係幾憧憬呢個世界，

出版社「玄武書房」製作中型日本語詞典《大渡海》，

男主角就係開始時參加咗呢個團隊，當入去呢個部份之前，

被資深的編輯問咗佢一題問題：

「你會點解釋你既右邊？」

男主角聽到後諗咗一陣，

「身體望住北面時嘅東方... ...」(大概係咁)

可能好多人都覺得無咩特別，但如果佢咁講，其實好多人都唔會在意自己習慣咗嘅生活細節，
我係覺得呢一段幾正。

作為一個寫作人(可能唔係好關讀者事)，我覺得係有需要對自己身邊嘅事物有多角度同敏感，

對我嚟講貼唔貼地、係唔係讀者心裡面個句，都唔係咁重要，

最重要係我可唔可以表達得好清楚我嘅訊息，比讀者又多角度同多層次去思考，

衰啲講，就好似AKB48咁，我放48個女仔出嚟，一個文青、一個野性、一個身材好，

即但一個，只要TAKE得中你就會支持成個團隊，

情況就係咁(又講遠咗添)
呢套作品(啟航吧！編舟計畫)，最吸引我嘅地方係佢寫描嘅細節同執著，

唔該唔好再用咩「宅男」嚟掩蓋哂呢個故事出色嘅地方，

雖然主角係一個唔識同人溝通嘅人，易係會被標籤成「宅男」，

但唔係一個「宅男」嘅代號就可以統稱哂架嘛，(BL都有分唔知幾多種攻，同幾多種受啦！又講遠咗~Sor9ly)

故事中由零開始去講製作一本無覺得可以「賺大錢」嘅字典，

強調係賺唔到大錢、已經重要用十幾年時間去做嘅一本字典，

只係因為佢地對文字嘅執著，呢一點令我好有感受。
係出版界中，大家好容易會知道咩書係可以好好賣，咩文章可以多人睇，

但大家... ...算啦，我當我自己啦... ...其實無咩特別都唔想寫食譜同旅遊雜誌，

第一唔係專門去寫開呢啲；

其次就係每一個作者(當係我自己一個)都有想表達嘅欲望，

好想同大家分享一個自己體會到嘅訊息，

例如：貼中咗場波、自己捧個隊球隊贏咗、show off 自己嘅fashion sens(要用英文)、講你鍾意嘅音樂、動畫、係你最鍾意嘅嘢... ...呢啲都係一種好個人嘅喜好，等有同好嘅人一齊嚟分享。
但係點解呢個網路嘅空間咁大，偏偏可以觸及嘅眼球係咁細？(開始離題啦喎，兜返嚟先！)

因為就係好多人覺得無市場需要，太重視利潤，

賺唔到錢，無咩人會支持你，變咗你唔可以有太多嘅自己係裡面。

或者你可以話改變咗自己都唔覺，因為你本來嘅目的唔係想做自己，係做人地眼中嘅自己(死...好深添自己都唔明)

無論如何... ...(呢招黃子華教嘅，兜完大圈番返嚟，一定得)

我只係想講呢套野，就係要講堅持同執著去完成自己想做嘅事，

特別係寫作上，只要努力去做好自己本份，(應該)可以完成到自己嘅夢想。
咁套嘢都好實際咁講咗好多佢哋要面對嘅問題，同解決方法，

但核心連繫住人物嘅，就係佢哋都感受到互相對事件嘅熱誠，

所以係另類嘅熱血作品，動畫中呢一點我覺得係做得好突出，

無真人版電影就無咁熱血，但係因為故事本身夠寫實，以電影係好好睇！

當然唔名小說好睇，可以多好多幻想空間。

但將佢動畫化之後，無諗過係可以做到呢種熱血嘅感覺。(我係講緊動畫架！)

不過... ...都係個句，無青少年市場，睇開輕小說嘅都可以會鍾意呢套嘢，
但睇開少年Jump動畫嘅，應該會悶死。

不過我都係想同有同感嘅人係到吹下水、R下稿費唧，唔好介意！

備註：我重幾鍾意睇「戀上春樹」同「真扎晃xxxxx」。