再見了!魔導少年。

動筆動畫化 於 19/07/2017 發表 收藏文章

唔覺唔覺,咁就過咗十一年,一直都以為係少年Jump,原來睇返先知係「週刊少年Magazine」。

第一次接觸「妖尾」(其實我一直也不太喜歡這個名),是在朋友介入下看單行本第一期,當時還有看另一套作品,感覺題材、畫功也十分相似,所以沒有特別去看。

直到動畫化之後,一直死追到天狼島篇之後,七年後返嚟真係頂唔順... ...

呢一套可以話係我有生而嚟好鍾意佢哋嘅角色,但故事真係唔想睇落去嘅動畫。
一開始我真係超爆鍾意去睇,係我心目中都係呢四個主角,

(真係每次要搵女角啲圖都好難慢慢簡,比人見到都以為我上緊AV網-.-)

就算之後發展出嚟角色,我都覺得好吸引,因為啲角色好清楚。
化敵為友重正能源過叮噹添呀。

但係故事真係太胡鬧、太多重好味、太多吐糟... ...套嘢過哂火... ...
《路人超能100》都認真過佢... ...
一次半次玩都無咩所謂,成個戰鬥都好似係求求其其被人折磨下就無啦啦打嬴咗,
吹到敵人幾勁都係會被納茲秒殺,即係佢先屈主角機,然後到主角屈返佢機,完。
(呢一點同海賊王一樣,所以我都無睇好耐)
打親都係SM露西!明明安排好哂人物關係,又會突然斷哂,
睇到我好莫名其妙!

其次就係我幾反感嘅係太多爆衫露肉,都唔知為咩... ...
一套明明可以好熱血好開心好正能量嘅少年動畫,搞到咁重鹽份... ...真係好可悲... ...

不過又好認真講,我唔係咁鍾意太正能源,
但當你想介紹呢套嘢比人睇嘅時候,
睇親都係露肉... ...真係介紹唔落手... ...

所以我會係好鍾意一開始只有少少鹽調一調味,
角色嘅感情線都好想睇,但作者就一條一條剪斷哂,
好似想CUT哂愛情元素咁,純友情都唔係問題,
咁你就唔好舖咁多線係到FIG人啦,
都唔知自己睇緊啲咩。

不過,呢一啲都係我個人睇法,
無疑佢真係一套好成功嘅動畫,
搞到我都要重新諗一諗,多角色嘅故事,
係咪真係可以咁玩法?大家都追得好開心喎。

整體呢個作品我覺得一開始會好鍾意,
但成個故事都好似無咩成長咁,一直唔好期望佢會有咩驚喜,
唔好有咩咁緊張,睇完就笑,(之前都會喊,到後段真係喊又喊唔出,笑又唔好笑......)
總知好似睇叮噹咁,完咗一篇,下一篇都係咁上下,
睇唔睇前面都無咩所謂,中間有咩關係都唔緊要,
其實講嚟講去,我真係幾鍾意魔導少年嘅角色同公會... ...
佢設計嘅魔法同人物真係好正,個世界觀其實係好大,
好多元素當中可以玩好多嘢,
但真係好唔開心見到成套嘢所有嘢都好似青蜓點水咁,
提咗都唔覺,故事嘅劇情發展又唔係咁理想... ...
不過... ...終於都完(最近先知)... ...有時間我會大魔鬥演武篇之後開始睇返... ...

後記:
其實我係真心鍾意「魔導少年」嘅人物同公會。
「魔導少年」對於我經常執著於「多角色」嘅創作係其中一個原因。

叛神軍團》雖然係之前已經寫緊,但其後嘅《DSE幻想校園》及《音樂漫遊
三個原創故事都好有影響,有機會再同大家解釋下當中嘅關係。(如果有人睇嘅話)

留言


請按此登錄後留言。未成為會員? 立即註冊
  • CalvinYik 於 20/07/2017 評論 NO. 1

    認同『成個戰鬥都好似係求求其其被人折磨下就無啦啦打嬴咗』!個納茲都唔知多咗咩技能,學咗啲咩!

快捷鍵:←
快捷鍵:→