新年期間守護模型實務指南(2020年,己亥-庚子年通用)

Will_KUSO 於 18/01/2020 發表 收藏文章
高達史上最慘烈的戰役是什麼?就是新年模型守衛戰!就算你的渣古捱過了所羅門與阿巴瓦空的戰場,農曆新年才是真正的「一年戰爭」。新年的親戚總會情緒勒索、道德綁架:「你都有咁多,分啲俾表弟啦」「唔好小氣啦」,之後?你的模型就沒有之後了,所以筆者推出這個「新年期間守護模型實務指南(2020)」


1,事前


1.1 基本防備配套(物理):
櫃鎖門鎖缺一不可,相信唔使我教,外加單車鎖我都聽過,想拆鐵欄起埋road block都自便,但期望唔好太高。

1.2 基本防備配套(心理)
各種創意十足言詞凶狠的警告標語經已不絕於facebook,但即使「立即退後否則使用布袋彈/實彈」拉埋封鎖線,智力低如popo都知道無用。

1.3 標價/列價目表
只能說好過冇,反而有被阿媽/老婆質疑做乜買咁貴玩具的風險。

1.4 犧牲低價模型引開注意力:
是下策,但破財擋災,價錢跌到谷底的Gundam Universe系列正好能夠充當此任務。甚至,去報攤/文具店買山寨玩具機械人頂替,反正都是機械人,不用分那麼多。順手送埋,皆大歡喜,隨時仲多封利是。


2,親戚來到時

2.1 確保鎖好:
鎖門鎖櫃是基本,一有門鐘聲請確認櫃門經已鎖好,必要時考慮用垃圾膠袋/報紙掩護玻璃櫃。

2.2 重兵嚴防:
鎖門未必夠,記住本人時刻都在應變範圍內,筆者看過一個經典案例,原本事主已經鎖門,落街幫手買飲品時一回來就見房門被爆,慘案就發生…

2.3 轉移注意力:
Youtube片、iPad遊戲,這些「電子奶嘴」都是引開親戚細路的良好手段,最吹脹是,整壞iPad一般親戚都唔會賴帳。

2.4 向道德綁架say no
杜絕「送個俾表弟」的「被送禮」歪風,一定要強硬,「咁你送部手機俾我啦」等等,佢幾強硬,你幾強硬就正確。驚人地面黑,考慮親戚感受?人地都未考慮你啦。


3,事發後
慘劇是發生了,你想咁就算嗎?新年年年有,今年你忍氣吞聲,出年就變本加厲;今年你被親戚用「道歉(仲要嬉皮笑臉)」或者「細路仔唔好怪佢」「唔好小氣」等等糊弄過去,明年絕對會歷史重演,而損失隨時更慘烈。以下的指南,係為了慘劇不再重演:

3.1 一定要道歉:
咁講,道歉是有用的,更需要拍片/錄音錄低,甚至簽名證明,因為在進一步追討時,有「道歉」的證明是非常有利的argument(詳見3.5)。


3.2 具體損失結算:
一定要追討,一定要追討,一定要追討,很重要所以再說多一次:一定要追討。記得係市價,尤其已升值的高價模型,仔細紀錄每部的損失狀況(需要修復?不能使用?),建議在拍賣網貨比三家,比幾個quote價,而嘈到(3.5)時,市價紀錄亦是十分重要的理據。

3.3 不要在親戚group炒大鑊:
反面還反面,留兩分面俾家長是必需的,對準政權PM私了,有理有節冷靜但強硬,盡量令對方明白嚴重性,而私下whatsapp最大好處是,避免其他親戚「三娘教子」,一人一句要你大事化小息事寧人。

3.4 要細路負責任:
賠償的比例中,可以建議要涉事細路按比例賠償扣零用利是,強調返,你係教緊你親戚教細路,要佢學負責任。你亦都唔使內疚唔使怕唔好意思,你係幫緊佢成家,下次佢出街整爛更貴的物件要賠更多時,佢自然識感激你。


3.5 終極絕招:小額錢債審裁處:
聽落好誇張?非也,「嘈上小額錢債」其實是常事,小額錢債審裁處的好處在於:
門檻低:只要填form排期,繳付低廉費用*即可獲得精美傳票一張。
具權威性:話晒都係司法機構,但要注意,勝訴亦不等於能夠立刻追討款項,審裁處並沒有頒令要求繳交賠償的權力,需要你再進一步追討,但勝訴的理據就是進一步行動的利器。
唔一定要上庭:好多時候,對方見到審裁處傳票都會跪,迫使佢達成具體賠款還款協議;即使去到審裁處,都可以由調解員協議調解自行解決,免卻去裁判庭申述裁決。
其實唔係咁嚴重:判決冇任何刑事成份,程序亦算方便快捷,雙方更無需律師,反而你如果需要簡單法律意見,可以去民政事務處的當值律師查詢。

*小額錢債的收費指引:
https://www.elegislation.gov.hk/hk/cap338B!zh-Hant-HK?pmc=0&m=0&pm=1

香港是法治社會,唔容許親戚或者某些紀律暴隊逃避責任,當你放過一個,就代表有第二三個受害者,挺身而出守護法治,係要靠有仇必報的義士。

裁判處的相關資訊請見:
https://www.judiciary.hk/zh/court_services_facilities/sc.html#4


留言


請按此登錄後留言。未成為會員? 立即註冊
    快捷鍵:←
    快捷鍵:→