抖音打擊粵語直播,廣州網民群起抗議,網紅宣佈退出平台

Will_KUSO 於 05/10/2022 發表 收藏文章
抖音一響……作為中国文化輸出代表嘅抖音,從來都爭議不斷,同政治間更係千絲萬縷說不清,近日中国抖音就被指禁制粵語直播,引發唔少兩廣網民抗議批評。

事源近月中国版抖音有多個用戶因為直播期間使用粵語,被系統引制中斷、審核甚至封號,原因顯示係「直播中包括無法識別的語言或文字」,粵語風行嘅廣東廣西區域網民大表不滿,引發一輪抗議潮。

唔少直播主都分享粵語直播喺中国抖音中被針對嘅例子,例如有人在直播期間被標示「請盡量說普通話,照顧一下來自四海的觀眾」其後更加被禁止直播。

即使係香港出身嘅藝人亦不能倖免,前亞洲小姐羅霖在9月底直播期間,同樣因為講粵語被「遮罩」,系統更顯示「直播中包含無法識別的語言或文字,直播多語言識別能力在完善中,將儘快支援多種方言和語種。」

亦有報告指有帶貨直播主因播放《光輝歲月》被強制中斷,呢首歌不只係香港著名抗議歌曲,在廣州「反推普」運動地位亦舉重輕重。

禁播粵語事件喺粵語區抖音用戶間可謂群情洶湧,其中最為哄動,係粉絲數達460萬嘅「廣東靚仔風少」宣佈退出抖音,佢喺短片中狠批,「抖音有功能自動為粵語語音配製字幕,但封鎖粵語主播帳號時竟以『無法識別語言』作為理由,實在非常荒謬」。
佢指粵語人口逾億,比好多國家人口仲多(若然粵語圈人口係獨立國家,全球人口排名至少係15名內),廣東網民數量更加是全國第一、網購消費力亦係全國第一。有網民就宣言:「廣東人可以沒有抖音,但是一定要有粵語」獲得唔少和應。

但係多個批評禁播粵語政策嘅直播主就遭遇處分,多條影片據悉被強行下架,理由係「涉及虛假信息」。

抖音係神係魔一直說法兩極,褒揚者,就話它成功開啟微短片嘅全球潮流,反而令IG、facebook跟風;批評者,既有人指佢私隱政策同政治背景可疑,平台上盛行嘅各式挑戰,也以無腦見稱,引致唔少死傷。

至於中国自從於兩廣地區加強推展普通話,對粵語打壓就不斷加強,亦引發粵語圈唔同世代反抗,2012年期間,就引發大規模線上線下示威,有分析亦相信,二十大近日展開,官方就借勢再度收窄粵語空間。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→