[邊個話紙皮係垃圾] NS新玩法,將電子遊戲帶返出實體,Nintendo Labo 4/20推出

I am Switch-er 於 18/01/2018 發表 收藏文章
雖然小弟成日講任天堂靠Switch強勢回歸,但對比PS4其實仲有好多嘢要追。因為本住"成本要比人哋低,效益要比人哋高"嘅原則,任天堂同佢比硬件從來都係輸,技術佢唔係無,只係唔做啫。不過慳咗喺硬件上嘅資源,其實都係用返落開發遊戲度,所以任天堂自家嘅出品都係出名重遊戲性。


經歷咗Wii U嘅失敗,為咗喺家用機再次突圍,又睇準咗手遊去到樽頸,就出一部帶得出街,但定位依然係家用機嘅Switch。不過Wii U失敗嘅主因正正就係缺乏第三廠嘅支持,所以一向清高嘅任天堂都要搵返啲大廠喺Switch出game。問題嚟喇,因為唔使推畫質,Switch嘅出現的確救到唔少細廠,但因為機能問題,啲大廠嘅新game、特別係大作大部份根本擺唔到落嚟,咁就出現咗瘋狂炒冷飯咁尷尬嘅局面。


正當連Bandai都炒隻SD Gundam G-Gen Genesis落Switch,個個都喺度恥笑緊嘅時候,任天堂同你你講佢仲有你估佢唔到嘅秘密武器;當其他平台走入咗不斷推高畫質嘅死胡同,任天堂同你講佢犧牲少少機能唔係剩係帶得出街玩咁簡單;當個個都係咁推AR/VR,強調遊戲都可以模擬返實境,會有真實感,任天堂同你講想玩game有真實感,就應該將隻game帶返出實體!


任天堂喺今日就宣佈一個Switch嘅全新玩法,"Nintendo Labo",會喺4月20號推出。叫得Labo就明顯食個Lab字,強調"Make, Play, Discover",想玩就自己砌"Toy-Con",結合Toy-Con同Joy-Con就體驗到Switch嘅全新玩法。首波推出會有兩個組合,Variety Kit同Robot Kit。


先講Variety Kit,由5樣嘢組成,分別係Piano、Motorbike、Fishing Rod、RC Cars同House。剩係呢個Variety Kit已經針得Sony好應,你玩VR釣魚game咩,我成個魚竿做出嚟;成日笑我啲賽車唔夠真咩,我自己砌返電單車個軚盤出嚟。

之後呢個Robot Kit仲勁,砌出嚟模仿返機械人打交,雖然揹住舊嘢有啲煩,不過紙又重得去邊,仲要解決埋VR玩得耐會頭暈嘅問題,任天堂呢步棋真係行得好絕。


不過賣得唔平架,Variety Kit賣US$69.99/¥6980,Robot Kit賣US$79.99/¥7980,所有嘢都只係卡紙嚟,就係咁先要出到自己砌。你一定會問點解,問心四五百蚊買舊卡紙模型你買唔買先,但要你自己砌(慳成本之餘)你就多個體驗,同埋擺明係攻親子市場。個仔/女成日嘈住要打機,做父母嘅最後點都會就範,呢個就正喇,打機之餘仲可以同仔女一齊砌,呢點先係最重要。


所以點解成日都話做人最緊要有公關呢,認真呢啲都唔算係好新嘅創意,仲要係卡紙,仲要賣四五百蚊,但佢就係夠膽出,諗埋點樣結合自身優勢去出,呢舖抵佢贏啦!

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→