[講極你哋都唔明] 神谷英樹爆seed連環15tweet解釋Bayonetta版權誰屬、點解第3集NS獨佔!

I am Switch-er 於 14/02/2018 發表 收藏文章
自從Bayonetta宣佈1、2集會移植落NS,Bayonetta 3會今年內喺NS出,好多人成日都問製作人神谷英樹點解唔出埋喺PS4,其實神谷英樹已經解釋過好多次個版權係任天堂嘅,唔係任天堂出錢根本呢隻game已經唔會再次出現喺大家眼前(詳情:Bayonetta會唔會重登PS平台?神谷英樹:"你自己問任天堂!")。但之後又有人challenge佢個版權唔係SEGA架咩、第1集可以移植到PS3甚至Steam都有出,點解而家唔得。神谷英樹從來都唔係善男信女,已經好聲好氣解釋俾大家聽你哋又聽唔明,今次終於忍唔住爆seed,喺個人Twitter連環15個tweet解釋Bayonetta版權誰屬、點解第3集係NS獨佔!


我有少少嘢想同你哋講,係關於Bayonetta 3。

我哋係開發者,當我哋開發一隻遊戲,我哋為咗填補開發成本,我哋會同發行商簽定合約先會有資金。


以Bayonetta 1為例,我哋同SEGA簽定合約兼由佢哋出資,我哋提出我哋嘅遊戲設計,之後就進入製作階段,所有嘅版權都係屬於SEGA。


喺嗰陣我哋(Platinum Games)先啱啱成立,我哋冇足夠資源做跨平台嘅開發,所以我哋同SEGA傾完就決定遊戲由Xbox 360獨佔。

但之後,喺SEGA嘅指示下,SEGA嘅其中一個貿易伙伴將遊戲移植落PS3。再近期啲,佢哋上年決定出Steam版本。所有版本嘅版權都係屬於SEGA。


當我哋製作Bayonetta 2,我哋一開始係喺SEGA身上取得資金去製作跨平台遊戲,但因為SEGA嘅緣故成個開發暫停咗。之後任天堂介入並為我哋繼續提供資金,等我哋可以完成開發。


所以(Bayonetta 2)嘅版權係同時屬於SEGA同任天堂。版權持有人決定隻game係做俾Wii U。


任天堂好好人,除咗提供資金俾我哋移植Bayonetta 1落Wii U,佢哋仲容許我哋將為咗Wii U版本而製作嘅日文語音擺喺PC版。


我真係非常感激任天堂提供資金俾我哋開發遊戲,亦都好感謝SEGA容許佢哋用Bayonetta呢個IP。


當我哋決定開發Bayonetta 3,我哋由一開始已經係用任天堂嘅資金開發。無佢哋嘅幫忙,我哋係無可能進行Bayonetta 3嘅開發。


所有(Bayonetta 3)嘅版權依然係同時屬於SEGA同任天堂。版權持有人決定隻game係做俾NS。


遊戲開發係一盤生意,每間公司都有佢哋嘅考慮同決策。意思係有時隻game可以完成製作,有時佢會被取消。


但我相信每一個有份參與嘅人都會盡力製作出一個最好嘅體驗。至少對我嚟講呢個係我整作遊戲嘅最大目標。


我無辦法表達出當我哋可以開Bayonetta 3係有幾咁開心,我哋盡哂全力去做好呢隻game。呢樣已經係我哋可以做到嘅所有嘢,亦都係我哋最大嘅任務。


Bayonetta 3仲需要少少時間先可以完成,但肯定嘅係佢嘅開發已經開始咗,希望佢會帶俾你哋一個完美嘅體驗。



同場加映,有唔少人都問神谷Bayonetta會唔會加入中文字幕,其實佢講過無數次你哋問任天堂啦。佢今次有再表達多少少,以往中國人都唔睇重知識產品,但呢個問題已經得到改善。不過最後都係任天堂決定架啦!



如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→