嚇我唔到嘅，寫錯架啫！GameStop FFXV廣告驚現NS版？ 精選 推薦

Final Fantasy未出嗰陣就好多人期待，話哂都最高畫質嘅FF喎，不過一出嗰陣就出事喇，多bug唔在講，故事唔完整嗰下弊。雖然曾經俾人插到體無完膚，但隨住幾次大型更新修復咗大部份嘅bug，加上幾個DLC補完返故事唔少嘅留白，其實隻game都值得玩。



先前已經出咗PS4同Xbox One版，亦都將主線故事卡通化出咗手機版，嚟緊8號就會出埋PC版，同時會就住PC版新增嘅元素喺PS4同Xbox One推出Royal Edition，奇怪嘅事就發生喇！喺外國GameStop嘅FFXV Royal Edition竟然寫住"PS4, XBOX ONE and Switch"！媽，我好亂呀！官方由頭到尾都無講過會出NS版喎，咁高畫質嘅game應該無乜人期待過會有NS版掛。不過之前製作人就講過FFXV會更新到2019年，會唔會突然之間出，俾個驚喜NS玩家呢？