ESA加入廢除網路中立性訴訟："廢除將摧毀線上多人遊戲！" 精選

咩係網路中立性，相信唔多人識，就等我喺度介紹下。網路中立性係一個原則，要求互聯網服務嘅供應商同政府需要平等處理網絡上嘅資料，唔同嘅用户、內容、網站、平台等都應該享有同等待遇，唔應該有差別收費。


自侵侵上台之後，美國聯邦通信委員會就想廢除由前美國總統所簽署嘅網路中立性條款，其訴訟依然進行緊。近日，ESA(娛樂軟體協會，即係E3嘅主辦方)正式加入呢單訴訟案，佢哋表廢除網路中立性將為遊戲界帶嚟極嚴重嘅影響，等同摧毀所有多人連線遊戲。


ESA官方聲明：
缺少呢個條款嘅保護，我哋同旗下嘅成員都會失去對網路供應商特定行為嘅法律追訴權，咁樣會對多人連線遊戲嘅玩家造成極嚴重嘅影響。同串流音樂、電影唔同，線上遊戲冇辦法利用緩衝解決連線不穩嘅問題，而係需要穩定兼一致嘅頻寬，如果有玩家嘅流量被刻意降低，將會造成不公所以我哋支持強制開放嘅網路保護措施，為遊戲界帶嚟成長、競爭同創新。