Star Wars Battlefront II全新課金系統即將登場，一早咁出咪乜事都冇 精選 推薦

Star Wars Battlefront II自推出以嚟，一直都受到各界嘅抨擊，主要係昂貴嘅英雄價格/唔合理嘅解鎖英雄所需遊玩時間，以及Loot Box含有大量影響遊戲平衡嘅元素，其爭議甚至影響到各國政府開始關注"課金抽蛋"嘅類似系統係咪等同賭博，連Apple都收緊相關要求，所有喺App Store上架嘅遊戲，如果有含付費抽蛋嘅元素都必須列明機率。


雖然當初EA跪低將成個課金系統抽起，但佢哋喺爭議聲中一直強調個系統只係暫時抽起，喺改好之後必定會回歸。而事隔4個月，全新嘅課金系統將會喺今個月21號正式回歸。喺21號更新之後，Star Cards會維持只可以透過遊玩解鎖，而原先嘅Loot Box將無法透過任何形式嘅貨幣入手，不論係Game錢定真錢，只能透過每日登入、完成指定挑戰或特定里程碑入手。其他唔影響遊戲平衡嘅裝飾、英雄或其他兵種嘅外觀等都可以直接用Game錢或付費水晶購買。


另外，EA都承諾玩家所有已經取得嘅道具/物品都會保留，大家唔需要擔心所有嘢要由頭解鎖過。