MHW再受歡迎亦敵不過Server；大作似乎不太似預期？ 精選

呢幾日相信咁多位獵人都係掛住屠龍架喇，不過龍就唔係話你想屠就屠，就算你set好哂"架餐"，約齊哂巴打，紮行埋個馬，都未必有得你屠。點解？因為不論PSN定Xbox Live個server都有問題囉！先講香港大部份獵人都靠嘅PSN，PSN都一向出名穩定"高"架喇，一到週末太多人一齊online佢都時不時斷，不過今次MHW實在太受歡迎，除咗一堆老手之外，仲有一班以前無玩開嘅見佢好似改易咗都入手試下玩，所以咪搞到由25偷跑到今日，無一日PSN係未試過出事。最尷尬係PlayStation HK 28號晚就搵咗陳伯開Live打，發生咩事就自己睇留言啦。


雖然亞洲就無發行Xbox One版，不過歐美係有出Xbox One版，你以為Xbox One版可能少啲人玩(歐美有Xbox One嘅人係多嘅，不過有興趣MH嘅應該唔多)個server負荷細啲就無事，點知仲衰，隻game連線都幾乎連唔到，你依然可以約friend一齊打，但就入唔到random嘅SOS，連官方都要出條tweet公告暫時用唔到呢個功能lol。


無疑MHW真係一款好作品、係好玩嘅，不過唔知係咪大家本身期望過高，玩落又好似未去到神作。首先，今次比起以往嘅MH加重咗故事嘅元素，為咗要大家真係會睇個故事，索性就唔俾你skip，要你乖乖哋坐定定睇哂佢先可以做任(，準確啲係未睇過嘅無得skip，睇過嘅就skip得)，而且每段唔係一兩分鐘咁短，好睇嘅都話無乜嘢，最慘係個故事好似為做而做咁，都幾嘥時間。


今集好多改動明顯係想吸新人玩，但為咗留得住啲老手又唔可以改得太過份，最後就變咗有少少唔上唔落。好似滅盡龍咁，老手就覺得對比以前見到新怪難到核爆，今次玩落都幾易，但新手依然覺得好難，特別想單機打得贏都係有排練(，不過MH就連機玩啦)。為咗照顧啲新手，今集加入咗教學模式，對新手固然係好，唔會唔知做緊咩吖嘛，但要堆老手接受二度教育就…… 不過點都好，MHW係好玩嘅。