ESA會長批評各國政府企圖打壓Loot Box："呢個係革新，唔係賭博！" 精選

隨住早幾年手遊崛起，唔少遊戲廠透過"遊玩免費、含課金元素"呢種模式賺到唔少，近幾年唔少遊戲廠都係家用機遊戲加入Loot Box呢個課金元素，好啲嘅就剩係含有改變外觀嘅元素，賺到盡嘅會加入Pay-to-Win嘅元素。其實唔少玩家對呢種做法係非常反感，因為免費+課金都叫做願者上釣，無人迫你一定要課金玩，但一隻俾咗錢嘅game仲迫人課金真係好難令人接受！


正當歐美各地政府都開始討論Loot Box係咪等同賭博，甚至比利時政府已經定性Loot Box就係賭博，ESA嘅會長Michael Gallagher卻大唱反調："政府嘗試規範Loot Box，咁樣即係針對業界自由革新嘅權利，好大機會為自由創作同發展出新商機帶嚟負面影響！" 佢認同Loot Box現階段係存在住一啲問題，但同時亦有利於遊戲界嘅發展，最終對玩家都係有利，所以絕對唔可以話Loot Box就係賭博！