玩家唔係唔受Paid Game要課金，只係唔受Pay-to-Win？ 精選 推薦

係呀，我又講Loot Box，咁係吖嘛，隻game免費要課金我明，你話隻game都叫完整，追加啲補完內容，要俾錢買DLC我都受，但點解我我俾咗full price仲要我keep住課金先！Star Wars Battlefront II超狼死嘅課金系統終於令玩家反彈，不過當各大廠商都諗緊無咗課金仲可以點搵錢之際，似乎有返啲曙光。


根據Gaming Today喺Qutee發起嘅調查，收集咗1862個回應以及嚟自458個討論區嘅10457票，結果顯示近7成人都表示可以接受僅包含客製化外觀內容嘅課金系統，只有6%受訪者直接表示點都唔會課金。似乎課金系統無問題，亦都有唔少人願意課金，不滿嘅只係Pay-to-Win呢種強迫課金機制，如果課金只係影響外觀，唔會影響實際嘅遊戲體驗，平有平玩，貴有貴玩，大家係接受嘅。