Advertisement

原來只係一廂情願,SONY阻止PS4版Fortnite與其他平台連線!

卡關の達人 於 14/03/2018 發表 收藏文章
早兩日寫呢篇"真正超越食雞嘅遊戲!Fortnite出足本手機版!"嘅時候已經好出奇,雖然跨平台連線唔係咩新鮮事,連一向唔點變嘅任天堂都肯讓步,令Minecraft同Rocket League都可以實現PC、Xbox One同Switch跨平台連線,但SONY一直以要維護其server安全為由拒絕,居然憑Fortnite可以再次打破SONY嘅底線?


最新嘅消息係SONY拒絕咗Epic Games對PS4版Fortnite嘅跨平台連線嘅請求。早前就有網民直接tweet Xbox嘅呀head Phil Spencer話想Fortnite可以實現Xbox One同PS4連線,Phil Spencer回覆"Me 2",而Fortnite官方都有留言"We 3"。好多人會諗點解出名封閉啲嘅任天堂都肯讓步,點解SONY會唔肯呢?


其實唔難理解,先講任天堂,Wii U個死症正正就係缺乏第三廠嘅支持,就算自家IP幾勁,遊戲種類選擇少真係好難吸引到非死忠。而家開放跨平台連線俾多個誘因你買機,何樂而不為?至於Sony唔係無獨佔作,都多嘅,但另一個賣點就係佢用户群夠大,如果大家玩啲重連線嘅game,都會傾向買PS4版,因為確保一定有人連線玩,所以即使要推畫質都唔使將部機嘅規格推到好盡。相反Xbox正正因為玩家驚無人玩嘅原因唔買,唯有以相近價錢出部規格好高嘅主機,但如果跨平台連線可以實行,反而呢個就會成為Xbox好大嘅優勢,所以Sony一直都唔肯讓步。


其實短時間內都幾難有誘因可以令Sony讓步,之前都話任天堂喺家用機界形同消失,Xbox又無可能夠佢鬥,先試過開放某啲遊戲可以同PC版連機(,都唔係家用機之間連機呀)。而家Switch咁強勢,Sony無可能再放棄佢任何嘅優勢。跨平台連線?FF下好喇!


如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→