傳Quantum Break續集已進入早期開發,雖不可信但仍值得期待!

卡關の達人 於 07/05/2018 發表 收藏文章
雖然喺亞洲地區討論度好似比較低,但其實Remedy Entertainment一直以嚟都出唔少神作,包括Max Payne、Alan Wake、以及呢篇文嘅主角Quantum Break。唔知大家有冇玩過呢?劇情我就唔劇透喇,但呢隻包含好多玩家玩故事game好鍾意嘅多元選擇,你點揀對故事嘅後續發展會有影響。另外,呢隻game揉合真人影集同遊戲,如果你好鍾意煲美劇嘅,呢隻一定好啱你玩!


雖然結尾留咗大大個伏筆,但唔知係咪因為隻game嘅主角都係搵啲幾出名嘅演員嚟拍,成本都幾高,即使遊戲大賣,一直都冇開發續集嘅消息。不過最近電影導演兼遊戲製作人H.R. Nikoofar,喺個人Twitter好肯定咁話Quantum Break續集已經開發緊。好多人即刻反駁佢,因為Remedy正全力Project 7神秘新作嘅開發,無乜可能會開發緊Quantum Break 2。H.R. Nikoofar就再發多條tweet:"我可以肯定Project 7唔會係Quantum Break 2,但Quantum Break 2的確已經進入早期開發階段。"

坦白講,可信性就唔高架喇,本身佢就無參與過第一集嘅開發,同時Remedy又唔係大廠,相信都幾難同時兼顧兩個大project,除非Project 7就係Quantum Break 2。再者,要出Quantum Break 2就一定要沿用第一集影片混合遊戲嘅模式,雖然第一集賣得幾好但唔代表第二集都可以,高成本但唔知回唔回到本嘅情況下,如果冇足夠嘅玩家群,都幾難說服到Remedy出續集。所以作為真係好期待第二集嘅我,即使明知佢係流料都依然好期待,最好就多啲人吹多啲呢啲風,吹到Remedy真係下定決心做第二集!

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→