手機只係配角,ROG Phone有埋呢堆配件先真係一部電競手機!

數碼情報站 於 06/06/2018 發表 收藏文章
噚日就喺《最強電競手機ASUS ROG Phone發表!Razer Phone都要退位讓賢?》就介紹咗ROG Phone有幾勁,但如果剩係得部機,充其量都只係一部好L勁嘅Android機,好似同電競都仲有啲距離。不過Asus好醒,無步一班"前輩"後塵,ROG Phone將會有一堆週邊配件,令ROG Phone成為一部真真正正嘅電競手機!


AeroActive Cooler (跟機附送)
用得超頻版S845,就算手機散熱做得幾好,部機都肯定兩下就變暖蛋。有見及此,Asus就出呢個配件,其實就係一個風扇,用家可以自訂風扇嘅轉速。唔好以為佢只係一個普通嘅風扇,首先佢同樣有ROG logo、同樣識發光,大家唔會因為插咗佢就遮咗信仰嘅認証!另外風扇底部有一個USB-C孔同一個3.5mm耳機孔,咁就可以維持返打橫部機打機都唔會俾充電線阻住哂嘅設計。

TwinView Dock
大家成日都話攞手機打機部機就做唔到其他嘢,咁呀,俾多個mon你囉ww。TwinView Dock就係俾多個mon俾你部ROG Phone,個mon同手機本身一樣都係一個6" FHD+ AMOLED mon,內建L/R掣。用家擺部機落去之後就可以一個mon打機、一個mon攞嚟開live(,實際就係上下mon可以同時開兩隻app)。Asus表示遲啲有開發商針對ROG Phone客製化嘅話,可以做到類似一個mon係主畫面、另一個mon show地圖嘅功能。

Gamevice Controller
其實就俾返個手掣ROG Phone,雖然我講得好平淡,但其實有返個手掣先係打機架嘛!

WiGig Dock
(m但係打機細mon唔夠爽架嘛,梗係要用大mon啦!(咁點解唔用電腦/家用機玩,唔好問,因為我都唔知ww) 呢個dock就係俾ROG Phone透過wifi將畫面串流去個大mon。

Mobile Desktop Dock / Professional Dock
最後呢個其實好多主打商務嘅手機都有類似嘅配件,個dock你想要嘅窿都有齊,HDMI、DP、LAN、USB-A、USB-C,連SD卡槽都有!擺部電話落去,即刻可以插返mouse同keyboard落去打機,呢個仲唔係實體外掛ww

傳聞128GB淨機賣$7198、512GB淨機賣$8498、512GB連所有配件賣$12398。值唔值就見人見智喇,為信仰嘅,唔使諗啦,狗衝啦ww。如果當正常手機用嘅,一定係偏貴,始於剩係部機都已經有一堆黑科技,預計香港第三季先會出,到時先諗啦!

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→