無咁大個頭唔好戴咁大頂帽!Pokemon GO Fest失敗收場終以150萬美金和解!

I am Switch-er 於 03/04/2018 發表 收藏文章
有陣時做人就真係無咁大個頭,就唔好戴咁大頂帽,唔小心高估咗自己真係會出事。講緊嘅就係Niantic,Pokemon Go真係好受歡迎,而本身都係鼓勵大家走出街玩,Niantic上年就開始搞啲實體event,其中最大穫嘅就係1週年搞嘅Pokemon GO Fest。雖然當時嘅遊玩人數有所回落,但話哂都係第一次出神獸,導致參與人數遠超預期。


講緊嘅遠超唔係預900人最後有1000人咁簡單,講緊係最終有成20000人湧入會場。一個公園(當然人哋啲公園梗係好大)塞咗20000人,官方本身又無預咁多,已經搞到成個安排變得好混亂,好多人不滿。點知(其實都知出事架喇)當地server負荷唔到咁大嘅流量,參加者唔好話打利基亞,係連game都開唔到!


其實Niantic已經即場決定退返入場費,兼喺game裡送返接近100美金嘅道具,問題係參加者嘅交通同住宿費係無任何補償,最終梗係搞到法院見啦。最近芝加哥法院就作出咗裁決,Niantic總共要賠償157.5萬美金,如果最終因為有人冇申請賠償或其他原因令呢157.5萬有剩,餘額要全數捐俾慈善團體Chicago Run。其實Niantic汲取咗呢個經驗,喺日本鳥取搞嗰次算係咁,只係估唔到呢個教訓咁大啫。

留言


請按此登錄後留言。未成為會員? 立即註冊
    快捷鍵:←
    快捷鍵:→