不忘初心嘅垃圾 - Digimon Adventure Tri.

卡關の達人於 14/05/2018 發表 收藏文章
入正題前,我想講明呢篇唔係一篇好專業嘅評論,只係小弟睇完呢套"垃圾"有感而發,可能好主觀,但我依然好希望大家會睇哂佢,就當支持下細佬啦。


四年前,第一次聽到會就住數碼暴龍01嘅故事、用返最初心嘅"8個被選中嘅細路"出後續動畫,相信唔少人同我一樣感到無比嘅興奮。如果你本身對數碼暴龍無感嘅話,大概我嗰陣興奮就好似大家第一次聽到FF7會重製、索粉喺上年E3見到好似睇戲咁款嘅Spider-man、任粉喺Nintendo Direct睇到Smash今年會出、Marvel迷終於等到舖咗10年嘅Infinity War,如果你都係理解唔到,睇下呢條片https://www.youtube.com/watch?v=DseTHfk8RxA


啱啱公佈啲作畫嗰陣已經心諗"唔L係掛",一套明明係好熱血嘅動漫,做乜畫到啲樣好似中哂輻射咁(,不過由仲讀緊書睇第一章,到今日出咗嚟做嘢睇最終章,其實畫嗰個係咪刻意用呢啲輻射樣,暗示大家都已經長大喇?),之後仲要公佈原定係電視動畫改做六章劇場版,嗰下已經知瀨嘢!點解?予定2015春嘅新番,要改做分6次,肯定係個故事改到唔知似乜做唔切先要斬件出,同埋仲要俾佢慢慢拖,你要知道就算一套值80分嘅動畫,如果一個完整劇情拖足年幾兩年你肯定唔會俾80分佢,你話係咪瀨嘢吖?(不過喺第四章推出前官方將佢定性為OVA,每集24分鐘,有齊片頭片尾,不過喺戲院上映會cut返走,保留返劇場版嘅流暢度。你最後都係將佢分做26集,咁你做乜唔等佢做好先出,26集都播到半年啦,定真係純粹想擺一擺上戲院、cap一cap水/.\)


最終出嚟果然係出哂事,剩係兩度改變製作模式已經顯示官方對呢個15週年企劃係有幾咁"重視"。作畫本身垃圾都算,成長期進化成熟期會變做數碼蛋推翻"死咗先會變數碼蛋"嘅金科玉律,俾人嘈完喺再進上去又放棄呢個設定,造成整個進化過程唔統一。再者,拖足兩年半明明有足夠時間去修正,可惜拖足兩年半只係單純要排期上戲院,並冇換嚟動畫質素上嘅提升。


不過即使佢有幾垃圾,我依然好"唔爭氣"咁睇哂,因為佢依然有小弟熟悉嘅設定,係咪都嗌肚餓嘅亞古獸、無論點都企喺大和嗰邊嘅加布獸……,縱然劇情上都改到同01原本好熱血嘅設定好唔同,但你不妨諗下17年過後嘅你又係咪同以前一樣?如果你同細佬我差唔多年紀嘅話,應該小三、小四第一次睇數碼暴龍,到今日都已經出咗呢個社會做嘢。坦白講,你應該都已經無咗當年嗰份童真、嗰份熱血,所以細心反思,雖然佢改到好似破壞緊大家嘅童年回憶,但同時亦都好赤裸咁反映大家已經被迫長大喇,和田光司嘅離世正正話咗俾大家聽無嘢係會永恒不變,任何嘢都會有佢終結嘅一日,包括當初嗰份熱血。


Tri嘅垃圾係因為佢拖(,當然最後刻意嘅留白同伏線都好核突),但睇埋第六章,其實劇情上係有呼應返成套動漫嘅改變,轉變係因為大家已經唔再係被選中嘅細路,而係要去創造未來嘅大人,不過無論發生咩事,我哋都係同伴!或者製作組最想帶出嘅係,即使你已經長大,做過好多你以前唔會做嘅決定,最緊要就係不忘初心,唔好忘記咗自己!Tri真係好垃圾,連當年嗰份熱血都放棄埋,但佢無忘記到數碼暴龍"無論發生咩事,我哋都係同伴!"嘅初心,無忘記到數碼暴龍嘅本質!


最後我想做一段歌詞作結:
"毋忘是為誰爭氣 無論會令誰走避 不管哪個信自己 留下我未對我捨棄
咬着牙關過 當初的我創造我 天真會 變大器 成就最動聽真實傳奇"
《吳安儀輕鬆挑機!?》

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→